Posted on: November 11th, 2024
Maandalizi ya Vitambulisho vya Msamaha kwa Wazee vitakavyowasaidia kupata matibabu bure yanaendelea katika Kata ya Ayamohe na Uhuru Halmashauri ya Mji wa Mbulu.
Kufuatia mwendelezo huo, Afisa Ustawi wa Jamii Halmashauri ya Mji wa Mbulu, Tomic Simbeye amezungumza na Wazee zaidi ya 100 waliofika kwenye Kata hizo kujiandikisha na kupiga picha kwa ajili ya Vitambulisho hivyo.
“Zoezi hili litawasaidia ninyi wazee wetu kupata Vitambulisho ambavyo vitawasaidia mpate matibabu kwa msamaha wa Serikali yaani mtatibiwa bure malipo malipo mkiwa na hivi vitambulisho” Aliongeza Simbeye
Kwa upande wa wazee waliofika kupiga picha na kujiandikisha wamesema kwa kuwa uwezo wao wa kulipa gharama za matibabu ni mdogo na wengine kushindwa kabisa, Vitambulisho hivyo vitawasaidia kupata matibabu na kuwa na Afya imara huku wakiishukuru Serikali kwa mipango hiyo saidizi kwa Wazee.
Zoezi hilo litaendelea kwa kuchukua taarifa na picha za Wazee hao katika maeneo mbalimbali ya Halmashauri ya Mji wa Mbulu mpaka tarehe 23 Novemba, 2024.
