Posted on: November 15th, 2024
Mwenyekiti wa Halmashauri ya Mji wa Mbulu Mhe. Peter Sulle amewasihi watumishi kufanya kazi kwa weledi ili kutimiza azma ya Serikali katika kuwaletea wananchi maendeleo.
Mhe. Sulle amesema hayo mapema leo tarehe 15 Novemba, 2024 akiwa kwenye Mkutano wa Baraza la Madiwani lililoketi ukumbi wa Halmashauri ili kujadili taarifa mbalimbali zinazohusu maendeleo ya Halmashauri ya Mji wa Mbulu.
"Niseme kwamba tumejadili mambo mengi hapa, niwaombe wakuu wa Idara, Vitengo na Taasisi zote na hata Waheshimiwa Madiwani tupo basi tukatimize wajibu wetu katika kuwahudumia wananchi, kwa sababu tusipotimiza wajibu sisi wananchi wataanza kuilaumu Serikali".
"Ninaomba tujitoe kwenye tabia ya kulalamika, nani kasababisha jambo kuharibika bila sababu za Msingi twendeni tukafanye kazi, tukawatumikie wananchi wetu kwa kutimiza wajibu wa Msingi wa kuihudumia jamii yetu" Aliongeza Mhe. Sulle
Mkutano huo wa Baraza la Madiwani umefanyika kwa siku moja ukihudhuriwa na Waheshimiwa Madiwani kutoka Kata 17 na Viongozi mbalimbali wa Halmashauri ya Mji wa Mbulu na baadhi ya Wananchi.
