Posted on: February 13th, 2026
Wananchi wa Kijiji cha Nahasey leo, Februari 13, 2026, wamepatiwa elimu kuhusu umuhimu wa kujiunga na Bima ya Afya kwa Wote kabla ya kukumbwa na changamoto za kiafya. Hatua hiyo ni sehemu ya juhudi za kuimarisha ustawi wa jamii na kupunguza mzigo wa gharama za matibabu kwa wananchi.
Akizungumza katika mkutano huo, Mratibu wa Bima ya Afya, Dkt. Basil Manda, aliwahimiza wananchi kuiona bima ya afya kama kinga na uwekezaji wa maisha yao, badala ya kusubiri kuugua kisha kuanza kutafuta fedha za matibabu. Alieleza kuwa kujiunga na bima mapema kunasaidia familia kupata huduma za afya kwa wakati na kwa gharama nafuu, pamoja na kuondoa usumbufu wa kuchangisha fedha wakati wa dharura.
Dkt. Manda alifafanua kuwa mifumo ya bima ya afya iliyopo imeboreshwa ili kuwafikia wananchi wengi zaidi, hususan wale wa vijijini, na kwamba Serikali inaendelea kuweka mazingira rafiki ya upatikanaji wa huduma bora za afya kwa wote.
Kwa upande wake, Afisa Ustawi wa Jamii wa Halmashauri ya Mji wa Mbulu, Ndugu Tomic Simbeye, aliwasisitiza wananchi kuwa mabalozi wa elimu hiyo ndani ya kaya zao na kuwahamasisha wengine kujiunga, ili kuhakikisha jamii inakuwa na ulinzi wa afya kwa pamoja.
Wananchi walishukuru kwa elimu waliyoipata, wakieleza kuwa imewafungua macho kuhusu faida za bima ya afya. Baadhi yao waliahidi kuanza mchakato wa kujiunga mara moja na kuwahamasisha ndugu na majirani zao kufanya vivyo hivyo.
Mafunzo hayo ni sehemu ya kampeni endelevu ya utoaji elimu kwa jamii kuhusu umuhimu wa Bima ya Afya kwa Wote, kwa lengo la kuongeza idadi ya wanachama na kuhakikisha kila mwananchi anapata haki ya huduma bora za afya bila vikwazo vya kifedha.
